Innanlands

Fólk í Suðuroy og Sandoy eru í størstum fátækraváða

Men ójavnin er minni í Føroyum enn í flest øðrum londum

2018-07-12 10:26 Author image
Ari av Rana

Hagstova Føroya hevur dagført hagtølini um inntøkuviðurskifti hjá føroyingum. Nýggju tølini geva eina mynd av nýtslumøguleikunum hjá húskjum og einstaka føroyinginum. Hagstovan skrivar, at ójavnin er minni í Føroyum enn í flest øðrum londum.

Mátið, sum verður nýtt til at máta ójavna, kallast Gini-vísitalið. Hetta er eitt ójavnismát, ið gongur millum 0 og 100%. Fyri Føroyar er hetta mátið 22,8 meðan tað er 28,9 í Danmark. Ginið-talið er vaksið spakuliga frá 19,3 í 2009 til 23,3 í 2015 og nú 22,8 í 2016. Gini-talið varð støðugt árini 2012-14.

Færri fólk eru í fátækraváða (undir 60% av mið-inntøkuni) í Føroyum enn flest øðrum londum:10,1% í Føroyum og 8,8 í Íslandi. 12-16% í hinum Norðanlondunum. Hesin parturin er tó vaksin nakað, frá 8,8 í 2009 og 8,5 í 2010 til nú 10,1% í 2016.

Parturin av fólkinum, sum er í fátækraváða (undir 60% av mið-inntøkuni), er størstur í Suðuroy og Sandoy: 15-17% har, mótvegis 9-11% í hinum sýslunum. 

Tað er í húskisbólkinum støk uttan børn, at ójavnin í bólkinum sjálvum er størstur: har er Gini-talið 28,8 samanborið við 22,8 fyri øll húski.

Stakir uppihaldarar eru mest í fátækraváða: 63,5% fyri tey, sum hava barn 0-5 ár, og 39,4% fyri tey við barni 6-17 ár, samanborið við 10,1% fyri øll húski.

Eftir aldursbólkum eru tað tey 67 ára gomlu og eldru, sum eru nógv flest í fátækraváða: 26,2%, og er parturin vaksin seinni árini. 67 ár o.e eru tættari uppi undir markinum fyri fátækraváða enn øll hini í fátækraváða.

Fyrivarni skal takast til, at nýggjastu tølini eru fyri 2016.

placeholder
placeholder