Mynd: Hans Erik Danielsen

Effodeildin: Ein nýggj byrjan fyri EB/Streym

Ítróttur > Effo deildin // Magasin
Í samstarv við FSF
04.03.2015 - 19:24

Í EB/Streymi fara tey undir eitt nýtt kappingarár í bestu deildini við einum heilt øðrum málsetningi, enn man plagar at hava. Ein av royndaru leikarunum í hópinum, Arnar Dam, sigur, at meðan man seinnu árini altíð hevur strembað eftir gullinum, so snýr tað seg í ár um at yvirliva í Effodeildini.

23 ára gamli kollfirðingurin Arnar Dam hevur í fleiri ár verið partur av besta hópinum hjá EB/Streymi. Tey flestu árini hevur hann fyri tað mesta verið innskiftari, men í ár verður leiklutur hansara ein heilt annar á liðnum.

– Árið í ár verður heilt øðrvísi enn undanfarin ár. Hetta er ein nýggj byrjan, sum vit nú fara undir, sigur Arnar Dam og sipar til, at frágongdin í EB/Streymi hevur verið sera stór í vetur, og at so at siga allir teir stóru profilarnir eru farnir úr felagnum.

Í mun til kappingarárið í fjør hevur EB/ Streymur mist so kendar leikarar sum Rene Tórgarð, Hans Paula Samuelsen, Gert Hansen, Arnbjørn Hansen, Marna Djurhuus og Egil á Bø. Leikarar, sum allir hava verið fastir fúsir millum teir fyrstu ellivu hjá felagnum í mong ár. Harafturat er ivamál um landsliðsleikaran Jónas Tór Næs.

– Tað eru fáir eftir frá byrjunaruppstillingini í fjør, so eg vænti, at eg komi at hava ein nógv størri leiklut á liðnum í ár, tí nú eri eg knappliga ein tann royndasti í hópinum, sigur Arnar Dam, sum hevur spælt 91 ferðir á besta liðnum hjá EB/Streymi í bestu deildini.

Hann sigur seg vænta størri ábyrgd á liðnum í mun til undanfarin ár, har hann í stóran mun hevur verið brúktur til at fylla hol orsaka av skaðum og leikbannum.

Hann sigur, at tað tykist eisini sum um, at fólk kring felagið góðtaka støð­ una, sum hon er í løtuni. – Tey vænta ikki nógv av okkum, og vit kunnu í veruleikanum bara yvirraska. Men hetta er ein støða, sum man sjálvur hevur ábyrgdina av, at vit eru komin í. Nú noyðast vit at seta næstan eitt heilt lið við í einum, tá ið man undanfarin ár skuldi havt sett fólk við so líðandi. Tað skilja áskoðararnir, og tí liggur einki trýst á okkum, sigur Arnar Dam.

Longri samrøða við Arnar Dam kann lesast í blaðnum, sum FSF hevur útgivið í samband við at kappingarárið í fótbólti er farið í gongd

Les blaðið her