(Mynd: Stroymingin hjá Kringvarpinum)

Fleyr bleiv fyrsta liðið sum basti Drátti

Niels Petersen

09.01.2017 - 21:38

Ítróttur > Ítróttur > Flogbóltur

Spennandi flogbóltsdystur var í høllini á Giljanesi í kvøld. Oddaliðið, Dráttur tók móti Fleyr, sum undan dystinum lá á fimta plássi. Munurin sum er á stigatalvuni sást tó ikki eins væl á spælinum. Dysturin var bæði tættur og spennandi.

Serliga fjórða settið var spennandi, har fyrst Dráttur legði seg framum heili 7-0, og so vant Fleyr seg í gongd, og spældi seg upp á javnt. síðani fylgdust liðini nakrar bóltar, fram til støðuna 24-24. So vann Fleyr ein góðan bólt, sum dansaði yvir eftir netkantinum eina løtu, og við einari sera væl plaseraðari servu frá Esther Rasmussen fekk Fleyr vunnið settið, og harvið javnað til 2-2 í settum.

Javnbrótarin, sum fimta sett verður nevnt, endaði við at Fleyr vann 09-15 og harvið hála tær seg upp á 11 stig, sama stigatal sum Mjølnir á fjórða plássi.

Hetta var sjeyndi dysturin hjá Drátti hetta kappingarárið, og ikki fyrr enn í kvøld føldu tær beiska smakin av ósigri. Hetta er tó gott fyri spenningin í kappingini, og tað bara økir um áhugan fyri ítróttinum.

Úrslit:

Dráttur - Fleyr 2-3 (09-25), (25-21), (25-20), (24-26), (09-15)


Støðan í deildini er henda:

1. Dráttur 18 stig fyri 7 dystir

2. KÍF 17 stig fyri 7 dystir

3. TB 14 stig fyri 7 dystir

4. Mjølnir 11 stig fyri 7 dystir

5. Fleyr 11 stig fyri 7 dystir

6. SÍ 7 stig fyri 7 dystir

7. ÍF 4 stig fyri 7 dystir

8. Ternan 3 stig fyri 7 dystir