Mynd: Reidar F. Joensen

Páll Klettskarð fyri Gilla Rólantsson

Sverri Egholm

29.08.2016 - 19:45

Ítróttur > Ítróttur > Fótbóltur

Týsdagin í komandi viku verður hol sett á undankappingini til HM, sum verður í Russlandi í 2018. Fyrsti dysturin verður á Tórsvølli ímóti Ungarn.

Men Lars Olsen, landsliðsvenjari, verður hesaferð noyddur at síggja burtur frá Gilla Rólantsson. Gilli fekk heilaskjálvta í fyrsta dystinum fyri Brann í Norra, og nú meta læknarnir í norska felagnum, at tvøramaðurin ikki verður tøkur til landsliðsfótbólt um eina viku.

- Venjarin og læknin eru samdir um, at eg skuldi vera her, og so verða 100 prosent klárur til týdningarmikla dystin, sum vit hava um tvær vikur, sigur Gilli Rólantsson við in.fo í kvøld.

Í staðin fyri Gilla Rólantsson hevur Lars Olsen úttikið Páll Klettskarð úr KÍ.

Seinnapartin mikudagin byrja fyrireikingarnar av álvara til dystin ímóti Ungarn, sum verður á Tórsvølli týsdagin 6. september klokkan 19:45.

Í komandi undankapping eru Føroyar í bólki B, saman við Portugal, Sveis, Ungarn, Lettlandi og Andorra.

Sí eisini: Video: Avrikið hjá landsliðnum er tað mest umráðandi