Nógvir ymiskir møguleikar í Wien

Tað kann gerast ein marrubólkur við bert heilt sterkum liðum, har einki liggur væl til Føroyar. Tað kann hátta seg so, at vit bert fáa millum tey allarbestu í stykisbólkunum omanfyri okkum.

Tað kann eisini vera, at Føroyar raka rætt, og millum annað fáa eina av veikaru vertstjóðunum úr potti 2 og eitt av liðunum úr styrkisbólki 3, har man heldur seg veruliga hava ein møguleika at spæla við um stig.

Eitt lutakast er tilvildarligt, og møguleikarnir í Wien eru nógvir. Høvuðsvenjari og ein av profilunum á landsliðnum hava á Portalinum sett orð á, hvussu tey síggja støðuna.

Sí eisini: 
Claus Mogensen: Hevði verið stuttligt at fingið eina vertstjóð
Súna vil spæla móti Íslandi aftur

Mynd: Eurohandball

Greiða skal eisini fáast á, hvar føroysku kvinnurnar skulu spæla søguligu dystirnar í vetur. Tríggjar vertstjóðir eru: Ungarn, Sveis og Eysturríki. Øll londini eru í styrkisbólki tvey. Ungarn er á pappírinum tað sterkasta av hesum - um man endaði í Ungarn (Debrecen) hevði tó verið møguligt at spælt sjálvan byrjanardystin. Hinir vertsbýirnir eru Basel og Innsbrück.

Sum eitt lið í niðasta styrkisbólkinum verður tað tungt, men spenanndi verður hvat lutakast Føroyar fáa í kvøld.

Lutakastið byrjar klokkan 17 føroyska tíð. Kringvarpið sendir frá klokkan 16.45. Til ber eisini at stroyma á Youtube-síðuni hjá EHF. Portalurin fylgir gongdini tætt við millum annað einum beinleiðis bloggi, sum verður á forsíðuni frá nakað áðrenn lutakastið byrjar. Eisini eru vit til staðar í Føroya Banka og fáa viðmerkingar frá spælarum og umboðum frá HSF.

Styrkisbólkarnir til lutakastið til EM 2024:

Bólkur 1: Noreg, Danmark, Montenegro, Frakland, Svøríki og Niðurlond

Bólkur 2: Týskland, Spania, Rumenia, Ungarn, Sveis og Eysturríki

Bólkur 3: Slovenia, Kroatia, Pólland, Serbia, Norðurmakedónia, Ísland

Pottur 4: Kekkia, Ukraina, Turkaland, Føroyar, Portugal, Slovakia