Uttanlands

Flotaovastin bjóðar seg fram ístaðin fyri fongslaðar sjómen

Ósemjan millum Ukreina og Russland stendur við

Havnin í Mariupol (Mynd: EPA)

Havnin í Mariupol (Mynd: EPA)

2018-12-06 08:18 Author image
Ingi Samuelsen

Í ósemjuni millum Russland og Ukreina bjóðar ovastin fyri ukreinska herflotan nú at býta seg sjálvan um við teir 24 ukreinsku herflotamenninir, ið verða afturhildnir í Russlandi.

- Tað sker meg í hjartað at síggja menn mínar verða ólógliga afturhildnir í Russlandi, sigur Ihor Vorontjenko, admiralur, við týska blaðið Bild.

Hann sigur, at hann er sinnaður at lata seg fongsla í Russlandi, um Vladimir Putin, forsetin, letur teir 24 herflotamenninar leysar.

Menninir bíða eftir rættarmáli í Russlandi, og kunnu vænta sær fongsulsrevsing fyri at hava gjørt seg inn á russiskt landamark.

Ósemjan millum Russland og Ukreina kyknaði aftur, tá trý ukreinsk herskip vórðu støðgað í Kerch-sundinum og fleiri av manningini handtiknir.

Sundið bindir Asovhav saman við Svartahav. Ein av týdningarmiklu útflutningshavnunum hjá Ukreina, Mariupol, liggur inni í Asovhavinum. Haðani slepst einans sjóvegis við at sigla gjøgnum tronga sundið við umstríddu Krim-hálvoynna.

Síðan Russland hertók Krim-hálvoynna frá Ukreina í 2014, hava russar fatað Krim sum russiskt øki.

Týsdagin upplýsti ukreinski ráðharrin fyri samferðslu, Volodymyr Omelyan, at ukreinsk skip nú aftur kunnu sigla gjøgnum Kerch-sundið.

- Skipini verða støðgað og kannað av Russlandi – eins og fyrr – men ferðslan er uppafturtikin, segði ráðharrin.

Eftir at Russland hertók Krim, hevur landið bygt eina brúgv um Kerch-sundið, og harvið er tað vorðið lættari hjá Russum at forða ukreinsku atgongdina til Asovhavið, skrivar Ritzau. 

[object Object]

placeholder
placeholder