2024-05-15 09:06 
Agnar Prestá
Agnar Prestá
Í dag er 15. mai, og harvið kunnu píkadekk ikki nýtast á flestu bilum frá í dag av.
Hetta minnir vaktleiðarin á løgreglustøðini í Havn á í morgun. Píkadekkini skulu av - um tey framvegis eru á, og ein verður steðgaður, so eigur tað í roynd og veru at geva bót.
Løgreglufólk kunnu tó í summum førum slaka og geva ávaringar. Vaktleiðarin vísti í morgun á tvey ítøkilig dømi frá í gjár, har fleiri vórðu støðgaði. Ístaðin fyri at geva bót, tosaðu tey á patrulju við fólk, sum gjørdu ímóti reglunum.
Eitt var fyribils ferðslubrot í Klaksvík. Í løtuni er partur av Stangavegnum á eystara armi - strekkið omanfyri Borg og Kjølbro Heilsølu - einvegis. Hetta er vegna ferðsluarbeiði.
Í gjár var ein patrulja á staðnum í trimum ymiskum tíðarbilum. Vaktleiðarin sigur, at tá vórðu 16 átalur givnar til bilførarar, ið ikki virdu skeltingina - summi vóru kanska forvirraði um skeltingina. Í hesum førum varð bót ikki givin, men tað verður tað helst næstu ferð á Stangavegnum.
Skúlapatrulja var í gjáramorgum. Í fleiri bilum sótu børn við skúlatasku á rygginum. Hetta er nakað, ið kann vera vandamikið, um okkurt óhapp hendir: Í so fall eru nakkin/høvdið hjá barninum í størri vanda fyri at fáa skaða. Harvið heitir løgreglan á foreldur um ikki at lata børn síni sita við skúlataskuni á í bili.
Vinarliga broyt tínar kennifíla - og privatlívsstillingar fyri at síggja hetta innihald