Starvsfelagið fer í samhugaverkfall

Starvsfelagið hevur í dag sent Vinnuhúsinum fráboðan um, at felagið fer í samhugaverkfall:

Fráboðan um samhugaverkfall við Føroya Arbeiðarafelag, Havnar Arbeiðarafelag, Klaksvíkar Arbeiðskvinnufelag, Klaksvíkar Arbeiðsmannafelag og Havnar Arbeiðskvinnufelag.

Starvsfelagið skal við hesum boða frá, at felagið lýsir samhugaverkfall á sáttmálaøkjunum millum Føroya Arbeiðsgevarafelag og Starvsfelagið frá kl 06 týsdagin tann 11. juni 2024. T.e. sáttmálarnir, sum umfata sáttmálaøkið vegna Føroya Tele, Posta og Vága Floghavn.

Samhugaverkfallið umfatar allar limir felagsins, sum eru umfataðir av omanfyri nevndu sáttmálum

Undantøk frá samhugaverkfallinum eru sambært galdandi sáttmálum:

Vísandi til § 33, Serreglur undir arbeiðssteðgi – Føroya Tele

og

Vísandi til § 27, Serreglur undir arbeiðssteðgi – Vága Floghavn.

Súni Selfoss, formaður

Starvsfelagið

Ógreitt hvussu leingi tað fer at vara

Starvsfelagið upplýsir ikki, hvussu leingi samhugaverkfallið verður, og orsøkin til tað er, at felagið ikki hevur tikið støðu til, hvussu leingi tað verður.

Tað sigur Súni Selfoss, formaður í Starvsfelagnum í viðmerking til Portalin.

– Tað hava vit ikki tikið avgerð um, vit fáa at síggja, hvussu tað gongur, sigur hann.

Dagførd kl. 14.50