Iran: Seks menn sleppa at stilla upp til forsetavalið

Iranska innlendismálaráðið hevur í dag almannakunngjørt nøvnini á seks monnum, sum hava fingið loyvi at stilla upp til iranska forsetavalið, sum verður 28. juni.

Ein teirra skal avloysa Ebrahim Raisi, sum doyði í einari tyrluvanlukku 19. mai.

80 valevni høvdu søkt um loyvi at stilla upp.

Tað eru teir 12 limirnir í iranska Varðmannaráðnum - seks serfrøðingar í islamiskari lóg, og seks løgfrøðingar - sum avgera, hvør er skikkaður at stilla upp til valið.

Millum tey valevnini, sum hava fingið loyvi at stilla upp, eru Alireza Zakani, borgarstjórin í høvuðsstaðnum Teheran, og formaður í iranska tjóðartinginum, Mohammad Bagher Ghalibaf.

Fyrrverandi forsetin, Mahmoud Ahmadinejad hevur harufturímóti ikki fingið loyvi at stilla upp, skrivar Ritzau.