Vøllurin á Djúpumýru handaður

Seinnapartin í gjár varð vøllurin á Djúpumýru formliga handaður Klaksvíkar kommunu.

Tað er minni enn ein mánaður síðani, at avtala varð undirskrivað um keyp av nýggjum vølli, so arbeiðið hevur gingið skjótt og væl, hóast veðrið hevur darvað nakað.

FSF hevur longu góðtikið vøllin, og í løtuni kannar ein kanningarstova, vegna UEFA, vøllin, soleiðis at vøllurin eisini verður góðkendur til altjóða dystir.

- Tær kanningar, sum longu eru gjørdar, síggja gott út, og tí er alt sum bendir á, at vøllurin á Djúpumýru fær sokallaðu UEFA Pro góðkenning, skrivar Klaksvíkar kommuna.

Tað er Føroya Møblasøla sum hevur veitt nýggja graslíkið í Djúpumýru.

Besta mansliðið hjá KÍ hevur vant nakrar ferðir á nýggja graslíkinum, og vann eisini 4-2 móti B36 í gjárkvøldið. Mikukvøldið tekur KÍ ímóti Differdange úr Luksemborg í fyrsta umfari í Champions League-undankappingini.