Svav rúsin av sær eftir hending uttanfyri Sirkus

Løgreglan er í løtuni í gongd við ymisk málrættað átøk. Eitt av teimum snýr seg um ferðslu og ferð, og ein patrulja var úti í Suðuroynni í gjár.

Tað var í Vági, at tveir bilførarar fingu klipp og bót fyri at koyra nakað yvir loyvdu hámarksferðina.

Vatkleiðarin á løgreglustøðini í Havn greiðir eisini frá, at ein persónur hevur sovið rúsin av sær á støðini í nátt. 

Talan er um eitt fólk, sum í gjárkvøldið var til ampa fyri onnur. Hetta var uttanfyri Sirkus í Vágsbotni, har viðkomandi millum annað stóð og rópti.

Løgreglan kom á staðið og tók persónin við sær á støðina. Viðkomandi var ávirkaður av rúsdrekka, hevur nú sovið rúsin av sær men verður skuldsettur fyri brot á skilhaldsreglarnar.