Arbeiðsloysi er nú undir eitt prosent

Hagstova Føroya hevur í dag kunngjørt nýggjastu tølini fyri arbeiðsloysi. Tey eru fyri august eru tey lægstu higartil í ár.

Fyri fyrstu ferð í 2024 er undir eitt prosent av føroysku arbeiðsfjøldini í arbeiðsloysi. Talan er um 0,9 prosent. Hetta svarar til 287 fulltíðararbeiðsleys.

- Ein fulltíðararbeiðsleysur er ein persónur, sum er arbeiðsleysur allan mánaðin. Tað merkir, at eru tveir persónar raktir av arbeiðsloysi ein hálvan mánað hvør, telja báðir samanlagt sum ein fulltíðararbeiðsleysur henda mánaðin. Í august vóru 364 persónar raktir av arbeiðsloysi, sum eru 128 fleiri enn í august í fjør, skrivar Hagstovan.

Harvið er arbeiðsloysi nakað minni nú enn seinastu mánaðirnar, men tað er eitt sindur hægri enn í august í 2023. Tá var arbeiðsloysið 0,7 prosent við 201 fulltíðararbeiðsleysum.

Hagstovan vísir á, at arbeiðisloysi er minst á Sandoynni (0,4 prosent) og størst í Suðuroynni (1,7 prosent)

Tað er serliga í Suðuroy, at fólk eru arbeiðsleys (Mynd: Hagstova Føroya)

Fleiri menn enn kvinnur eru fulltíðararbeiðsleysir, og størsta arbeiðsloysi eftir aldursbólki er millum tey, sum eru 25 og 34 ár (1,4 prosent).

Til ber at síggja meira á hagstova.fo