Agnar Prestá
Á midnátt fór freistin hjá økisfeløgum Tjóðveldsins at lata uppskot inn um nýtt forfólk.
Høgni Hoydal kunngjørdi fríggjakvøldið alment - og fyrr í mánaðinum fyri flokkinum - at hann nú steðgar sum formaður eftir 24 ár.
Sí eisini: Høgni fór ikki vegna rumbli hesa vikuna
Tað er nú endaliga greitt, at Tjóðveldi fær eina forkvinnu á fyrsta sinni. Sum spátt ymsastaðni fer valið at standa millum Bjørt Samuelsen og Sirið Stenberg.
Stríðsval verður millum havnarkvinnuna og vágskvinnuna á Hotel Føroyum leygardagin eftir døgurða.
Báðar eru royndar í politikki. Í løtuni er Bjørt Samuelsen tingforkvinna, og Sirið Stenberg er landsstýrisfólk í almanna- og mentamálum.
Dennis segði nei takk - Hervør verður næstforkvinna
Møguleikarnir vóru fimm í tali - tey sum vórðu vald inn í 2022, umframt Høgni Hoydal. Økisfeløgini sendu uppskot inn um tvey forfólk: Bjørt Samuelsen og Sirið Stenberg.
Sum skilst kom eisini okkurt uppskot inn frá limi í flokkinum um Dennis Holm men valdi landsstýrismaðurin í fiskivinnumálum ikki at taka av.
Tað verður ein ung næstforkvinna. Hervør Pálsdóttir er í uppskoti til nýtt næstforfólk - Sirið Stenberg er tað í løtuni.
Annika Olsen varð eisini vald inn í 2022.
Eykaflokstingiið hjá Tjóðveldi verður leygardagin klokkan 12 á Hotel Føroyum. Har verður greitt, hvør skal stjórna flokkinum víðari. Fundurin er fyri limir. 48 atkvøður eru til valið av nýggjum forfólki.
Dagført: 09.24
Vinarliga broyt tínar kennifíla - og privatlívsstillingar fyri at síggja hetta innihald