Alda Nielsdóttir
Í gjár frættist í fleiri miðlum, at komandi amerikanski forsetin, Donald Trump hevði tosað í telefon við russiska forsetan, Vladimir Putin um kríggið í Ukraina.
Hendan søgan varð m.a. deild á heimasíðuni hjá tíðindastovuni Reuters og blaðnum Washington Post, men sambært talsfólki hjá russisku stjórnini, Dmitrij Peskov er hon ikki sonn.
– Tað er fullkomiliga skeivt. Tað er rein fiktión. Tað er bara følsk kunning. Har var eingin samrøða, sigur Peskov sambært Ritzau.
Tá hann varð spurdur av journalistum, um Putin hevur ætlanir um at seta seg í samband við Trump, svaraði Peskov, at ongar ítøkiligar ætlanir eru um hetta enn.
Sambært keldum hjá Washington Post skal Trump hava heitt á Putin um ikki at herða kríggið í Ukraina, og eisini varð sagt, at Trump ynskti at hava eina uppfylgjandi samrøðu við Putin um, hvussu ein loysn kann finnast á krígnum.
Vinarliga broyt tínar kennifíla - og privatlívsstillingar fyri at síggja hetta innihald