Hagstovan: Innflutningsvirðið minkað 833 milliónir krónur

Í tíðarskeiðnum oktober 2023 til september 2024 innfluttu føroyingar fyri 10,7 milliardir krónur.

Tað eru 833,2 milliónir krónur, ella góð sjey prosent, minni enn undanfarnu 12 mánaðirnar, skrivar Hagstovan.

Minkingin í innflutninginum stavar í høvuðsheitum frá lægri innflutningsvirði á brennievni og skipum. Innflutningurin av brennievni og øðrum oljum er minkaður 483,8 milliónir krónur, góð 24 prosent, sum í høvuðsheitum stavar frá lægri prísum.

Innflutningurin av maskinum, motorum, skipum og akførum er minkaður við 195,3 milliónum krónum ella 6,3 prosent. Hetta er fyri tað mesta skip.