Jón Magnus Joensen sýnir fram í Smiðjuni

Í døgunum frá 22. til 26. november hevur Jón Magnus Joensen málningaframsýning í Smiðjuni í Lítluvík í Havn.

Myndevnini á framsýningini eru flestu frá høvuðsstaðarøkinum og lýsa hetta á ymsan hátt. Tað eru fleiri enn 30 málningar við á framsýningini, bæði størri og smærri.

Umframt málningarnar, so eru nógvar myndir, ið eru málaðar við akryl á pappír. Hesar hanga ikki uppi.

Jón hevur málað frá ungum árum, og hevur síðan tá havt sjálvstøðugar málningaframsýningar við jøvnum millumbili. Harav fleiri í Smiðjuni í Lítluvík. Hann hevur eisini luttikið bæði á felags framsýningum og sensureraðum framsýningum.

Jón var á listaskúla í Danmark í 2003. Stílurin er ekspressionistiskur við naturalistiskum eyðkennum. Málningarnir eru litfagrir, har ljósið spælir sín leiklut.

Jón er argjamaður og býr á Toftum. Her hevur hann egið atelier.

Framsýningin er opin fríggjadagin kl. 15 til 19 og til og við týsdagin frá 11 til 18, sunnudagin tó frá kl. 14.