Avgerð um Watson verður tikin innan 14 dagar

Danska løgmálaráðið fer væntandi skjótt at taka avgerð um, hvørt umhvørvisstríðsmaðurin Paul Watson skal útflýggjast til Japan.

Tað verður innan 14 dagar, hevur løgmálaráðið upplýst fyri Julie Stage, sum er sakførari hjá Watson, skrivar Ritzau.

Watson hevur verið varðhaldsfongslaður í grønlendska høvuðsstaðnum Nuuk, síðan hann varð handtikin 21. juli. Orsøkin eru altjóða handtøkuboð frá Japan, sum ynskir at rættarsøkja hann fyri brotsverk, sum vórðu framd í 2010.

Paul Watson noktar seg sekan.