Lata upp fyri almennari ferðslu stutt eftir klokkan 14

Tað er stórur dagur fyri mong, nú nýggju tunlarnir Norður um Fjall lata upp fyri almennari ferðslu.

Hetta verður sambært Landsverki stutt eftir klokkan 14:

- Umleið klokkan 14.10 verður latið upp fyri almennari ferðslu frá tunnilsmunnanum Hvannasundsmegin. Umleið klokkan 14.20 verður latið upp fyri almennari ferðslu frá tunnilsmunnunum í Árnafirði og í Ánunum.

Sí eisini: Tunlarnir norður um Fjall góðkendir til almenna ferðslu

Tað er tó møguleiki fyri at fara gjøgnum tunnilin áðrenn hetta. Nú klokkan 12 fara fólka at renna/ganga ella súkkla gjøgnum 

- Áðrenn hátíðarhaldið verður í samstarvi við Treysti (felag fyri frælsan ítrótt í Norðoyggjum) og súkklufelagið Norðstrok høvi at renna/ganga og súkkla ígjøgnum nýggju tunlarnar. Renningin og súkklingin byrjar klokkan 12 við tunnilsmunnan í Ánunum, skrivar Landsverk.

Sambært Landsverki skulu gomlu tunlarnir framyvir bert nýtast, um so at einhvør neyðstøða er, ella um nýggju tunlarnir brádliga ikki kunnu nýtast.

Annars er seinasta umfar/seinasti møguleiki fyri at koyra suður gjøgnum gomlu tunlarnar frá Hvannasundi og Árnafirði klokkan 12.15.

Klokkan 13.15 er seinasta umfar/ seinasti møguleiki fyri ferðslu norðureftir gjøgnum gomlu tunlarnar frá Ánunum og Árnafirði. Hareftir verða tunlarnir stongdir.

Les eisini: Landsverk kunnar um ferðsluna norður um Fjall

Tað er eisini klokkan 13.15 at Kringvarpið byrjar at vísa frá hátíðarhaldinum, sum byrjar klokkan 13:30 við tunnilsmunnan "Hvannasundsmegin".