Fimm skuldsett í sambandi við deyða Liam Payne

Fimm persónar eru skuldsettir í málinum um fyrrverandi One Direction-sangaran, Liam Payne, sum doyði á einum gistingarhúsi í Argentina í heyst.

Tað upplýsir ákærumyndugleikin í Argentina sambært BBC.

Liam Payne doyði, tá hann datt av einum svala á triðju hædd á Casa Sur Hotel í argentinska høvuðsstaðnum Buenos Aires 16. oktober. Stjórin og tvey starvsfólk á gistingarhúsinum eru skuldsett fyri óviljað manndráp, meðan tvey onnur starvsfólk eru skuldsett fyri at hava givið Liam Payne rúsevni.

Líkskoðanin vísti, at Liam Payne hevði rúsevni, rúsdrekka og heilivág fyri tunglyndi í blóðinum, tá hann doyði, skrivar Ritzau.