Alda Nielsdóttir
Amerikanski forsetin Joe Biden hevur tosað við ísraelska forsætisráðharran Benjamin Netanyahu um samráðingarnar um vápnahvíld millum Ísrael og Hamas, sum hava verið í kríggj síðan oktober 2023.
Tað var í telefonsamrøðu í gjár, at teir báðir leiðararnir umrøddu samráðingarnar um vápnahvíld og leyslating av gíslum, sum í løtuni eru í gongd í Katar, skriva Hvítu Húsini.
Einki ítøkiligt verður tó sagt um eina møguliga avtalu, men trygdarráðgevin í Hvítu Húsunum, Jake Sullivan segði sunnudagin við CNN, at partarnir vóru sera nær við at fáa eina avtalu í lag, men at teir enn ikki vóru komnir heilt á mál. Hann legði afturat, at Biden dagliga verður kunnaður um gongdina í Katar, skrivar Ritzau.
Í telefonsamrøðuni vísti Biden á týdningin av at fáa vápnahvíld í Gaza alt fyri eitt, at fáa gíslar leysnatnar og at fáa meira neyðhjálp inn í Gaza, og ísraelski forsætisráðharrin takkaði Biden fyri stuðulin, sum USA hevur latið Ísrael.
Um eina viku, 20. januar, verður Donald Trump tikin í eið sum nýggjur forseti í USA, men sambært Sullivan er møguleiki fyri, at ein avtala um vápnahvíld verður gjørd, áðrenn Biden fer úr Hvítu Húsunum.
Vinarliga broyt tínar kennifíla - og privatlívsstillingar fyri at síggja hetta innihald