Barnafilmsfestivalurin verður settur fríggjadagin

Fyri fyrstu ferð nakrantíð hava Føroyar fingið ein barnafilmsfestival. Hetta skal fagnast.

Tað staðfestir Norðurlandahúsið, sum verður ein av vertunum á heimasíðu sínari.

Føroyski festivalurin verður settur nú fríggjadagin 17. januar. Hetta frá klokkan 17 í forhøllini. 

- Vælumtókti tónleikabólkurin DJ Kingz byrja filmsfestivalin við einum braki. Undirhald fyri øll børn og barnsligar sálir.

Síðani verður live-dubbað sýning av Oscar-tilnevnda teknifilminum Úlvafólk.

Heimasíðan nlh.fo greiðir frá, at live-dubbing merkir, at meðan fólk kunnu njóta filmin í biografmyrkrinum, sita leikarar á fremstu røð við mikrofon og pannulykt, og leggja føroyskar røddir til - beinleiðis úr salinum  

Filmurin sjálvur snýr seg um eina unga gentu, sum fer til Írlands við pápa sínum við tí fyri eyga at avoyða seinastu úlvarnar. Her verður hon vinkona við eina djarva gentu úr eini duldarfullari ætt, sum sigst at kunna broyta seg til úlvar um náttina. 

Filmurin hóskar seg best til aldursbólkin úr 7 ár. Trygvi Danielsen hevur týtt handritið til føroyskt -  Durita Dahl Andreassen leikstjórnar.

Filmshúsið hevur tikið stig til barnafilmsfestivalin, hvørs endamál er at geva børnum úr øllum aldursbólkum eina góða filmsuppliving og kveikja teirra áhuga og forvitni fyri filmi á føroyskum.

Barnafilmsfestivalur verður 17.-19. januar í Runavík, Klaksvík og Havn.

Kringvarpið sendir partar av tiltakinum - sí tí skránna niðanfyri.

Mynd: kvf.fo

Dagført: 16.08