Alda Nielsdóttir
Ísraelski forsætisráðharrin, Benjamin Netanyahu hevur tikið avgerð um at steðga neyðhjálp í at koma inn í Gazageiran.
Samstundis boðar skrivstova hansara frá, at Ísrael ikki fer at góðtaka eina vápnahvíld uttan leyslating av gíslum. Noktar Hamas at leyslata fleiri gíslar, fær tað avleiðingar.
Hendan fráboðanin kemur, eftir at fyrsta stig av vápnahvíldini, sum byrjaði 19. januar, endaði í gjár. Hvussu verður frameftir, er enn ógreitt.
Hamas krevur, at næsta stig av avtaluni fer í gongd, meðan Ísrael ynskir at leingja fyrsta stig. Ísrael ynskir at leingja núverandi vápnahvíld til eftir muslimski føstumánaðurin Ramadan, og jødiska hátíðin pesach er av 20. apríl.
Í fyrsta stigi av vápnahvíldini, vóru partarnir m.a. samdir um, at burturriknir palestinar skuldu sleppa heimaftur til norðara part av Gaza, og at Hamas skuldi leyslata 33 av teimum umleið 100 gíslunum, sum framvegis vóru í Gaza, harundir kvinnur, børn og menn yvir 50 ár. Ísrael skuldi leyslata allar palestinskar kvinnur og palestinar undir 19 ár úr ísraelskum fongslum.
Restin av gíslunum í Gaza skuldu leyslatast undir næsta stigi av vápnahvíldini, sum skuldi slóða fyri einari varandi vápnahvíld.
Vinarliga broyt tínar kennifíla - og privatlívsstillingar fyri at síggja hetta innihald