Hamas tekur undir við egyptiskum uppskoti um vápnahvíld

Hamas tekur undir við einum egyptiskum uppskoti um vápnahvíld í Gaza, sum palestinska hernaðarrørslan hevur fingið í farnu viku.

– Fyri tveimum døgum síðani fingu vit eitt uppskot frá meklarum í Egyptalandi og Katar. Vit hava givið tí jaliga viðgerð og hava góðtikið tað, segði Khalil al-Hayya, Hamas-leiðari um vikuskiftið.

Uppskotið innber leyslating av fimm gíslum, og at vápnahvíldin verður longd við 50 døgum. Harafturat skulu samráðingar byrja um næsta stig av vápnahvíldini.

Millum gíslarnar, sum væntast at verða leyslatnir eftir hesu avtalu er ísraelsk-amerikanski Edan Alexander, sum sigst at vera seinasti núlivinda amerikanski gíslin, sum er eftir í Gazageiranum.

Skrivstovan hjá ísraelska forsætisráðharranum hevur boðað frá, at hon hevur fingið uppskotið, og at eitt annað uppskot er lagt fram, sum er orðað í samstarvi við USA, sum m.a. snýr seg um at leyslating av tíggju gíslum heldur enn fimm.

Ísrael og USA vilja eisini hava Hamas letur seg avvápna, men tað verður ikki, so leingi ísraelska hersetingin heldur fram, sigur al-Hayya.

Sambært tíðindastovuni AP verður mett, at 59 gíslar framvegis eru í Gazageiranum, harav 24 eru á lívi.