Fleiri koyrdu ov skjótt í Eysturoynni

Fleiri bilførarar í Eysturoynni eru hetta seinasta samdøgrið avdúkaðir fyri at hava fótin í so tungan á spitaranum.

Frá klokkan 18.15 og ein tíma fram var ferðsluløgreglan á vegnum til Fuglafjarðar fyri at máta ferð. Her vórðu tveir bilførarar støðgaðir og skuldsettir fyri at koyra ov skjótt.

Annar varð máldur til 112 kilometrar um tíman og fær klipp í koyrikortið. Hin varð máldur til 117 kilometrar um tíman og fær treytaða frádøming av koyrikortinum.

Tíðliga í morgun millum kl. 04.45 og 06.05 var aftur ferðamáting, hesaferð í brekkuni millum Skipaneskrossin og Gøtueiði. Aftur hesaferð vóru tveir bilførarar, sum koyrdu ov skjótt.

Annar koyrdi 107 kilometrar um tíman og fær klipp í kortið, hin varð máldur til 117 kilometrar um tíman og fær treytaða frádøming.

Harafturat varð ein bilførari støðgaður undir illgruna fyri ikki at vera heilt edrúur. Hesin bilførari varð handtikin og er nú skuldsettur fyri rúsdrekkakoyring.