Uttanlands

Kim Jong-un skal hitta Putin í Russlandi

Roknað verður við, at fundurin millum Kim og Putin verður í havnarbýnum Vladivostok

Kim Jong-un (Mynd: EPA)

Kim Jong-un (Mynd: EPA)

2019-04-23 08:29 Author image
Ingi Samuelsen
placeholder

Norðurkoreanski leiðarin, Kim Jong-un, fer ein av komandi døgunum til Russlands, har hann skal hava samrøður við Russlands forseta, Vladimir Putin.

Tað boðar almenna norðurkoreanska tíðindastovan, KCNA, frá í dag, sambært Reuters.

Fundurin er ikki dagsettur enn, men sambært KCNA verður hetta skjótt.

- Kim fer í næstum til Russlands at vitja eftir innbjóðing frá Putin. Teir fara at hava samrøður undir vitjanini, skrivar tíðindastovan.

Undan páskum boðaði russiska forsetaskrivstovan í Kreml frá, at Kim Jong-un fer at vitja Rusland ”síðst í apríl”.

Enn er óvist hvar í Russlandi fundurin teirra millum verður hildin.

Men fleiri miðlar nevna havnabýin Vladivostok, sum ein møguleika, tí hann liggur nærhendis Norðurkorea og Kina, sum Putin eisini skal vitja seinni í apríl.

Høvuðsráðgevin hjá Kim Jong-un, Kim Chang-son, var, sambært suðurkoreansku tíðindastovuni Yonhap, sæddur í Vladivostok páskadag.

Eisini miðilin NK News, sum bert skrivar um Norðurkorea, legði í gjár myndir út á heimasíðu sína, sum vísti arbeiðsfólk, sum settu russisk og norðurkoreansk fløgg upp á einum universiteti í Vladivostok.

Sambært AFP verður fundurin í morgin ella hósdagin. Hetta verður fyrstu ferð, at hesir báðir statsleiðararnir hittast.

Í februar hitti Kim Jong-un amerikanska forsetan, Donald Trump, í Hanoi í Vietnam. Tað var annar fundurin teirramillum. Fleiri eygleiðarar meta fundin vera miseydnaðan, tí einki konkret kom burturúr. 

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder