X fær risabót frá ES

Sosiali miðilin X hevur fingið eina bót á 120 milliónir evrur fyri at hava brotið reglurnar hjá ES um gjøgnumskygni.

Talan er um eina upphædd, sum svarar til umleið 900 milliónir krónur, skrivar Ritzau.

Sambært ES-nevndini hevur X, sum ríkmaðurin Elon Musk eigur, ikki livað upp til reglugerðina hjá ES um talgildar tænastur.

Í ES eru tey ónøgd við "villeiðandi sniðnum" hjá sosiala miðlinum.

Tað snýr seg um bláa flugubeinið, sum vísir, at ein brúkari á X er "váttaður". Hetta var fyrr bert ætlað almennum persónum og fyritøkum, men í dag kunnu øll gjalda fyri at fáa eitt slíkt flugubein.

Talan er um eina broyting, sum Elon Musk kom við, eftir at hann keypti sosiala miðilin, sum tá æt Twitter, í 2022.

ES metir eisini, at X ikki hevur tryggjað nøktandi gjøgnumskygni í mun til lýsingar á sosiala miðlinum.

Áðrenn bótin varð kunngjørd, ávaraði amerikanski varaforsetin, J.D. Vance ímóti tí, sum hann nevnir "sensurur" og eitt álop hjá ES á amerikanskar fyritøkur.

Amerikanski uttanríkismálaráðharrin, Marco Rubio sigur, at avgerðin hjá ES er eitt álop á allar amerikanskar tøknipallar og amerikanska fólkið.