Julian Gregersen sett nýtt føroyskt maratonmet

Seinastu tíðina hevur 27 ára gamli langtteinarennarin Julian Gregersen tikið fleiri føroysk met, og tað gjørdi hann aftur í morgun.

Tíðliga í morgun okkara tíð luttók hann í Valencia Marathon í Spania, og har tók hann føroyska maratonmetið, tá hann kom á mál við tíðini 2.21.30.

Gamla metið á 2.27.53 átti Absalon Hansen, og tað varð sett í Hamburg í 1988.

Higartil í ár hevur Julian Gregersen tikið metið á 1500 metrum, fimm kilometrum á breyt, 5000 metrum á vegi og í hálvmarathon.