Venesuela: Politiskir fangar skulu fáa amnesti

Virkandi forsetin í Venesuela, Delcy Rodríguez hevur ætlanir um eina nýggja lóg, sum gevur politskum fangum, sum eru handtiknir síðan 1999 amnesti.

Suðuramerikanska landið hevur í áravís handtikið útlendingar og andstøðingar eftir ákærur um alt frá njósning til ætlanir um álop, og útlendskar stjórnir hava leingi ført fram, at ákærurnar eru lygnir, og at handtøkurnar í veruleikanum eru gíslatøkur.

Lógin kann fáa týdning fyri hundrað fólk, sum eru fongslaði í Venesuela. Lógin verður tó ikki galdandi fyri fólk, sum hava luttikið í drápi ella álvarsligum mannarættindabrotsverkum ella brotsverk, sum hava samband við rúsevni, skrivar Ritzau.

Eisini er tað ætlanin hjá virkandi forsetanum í Venesuela at steingja fongslið El Helicoide í høvuðsstaðnum Caracas, at mananrættindafelagsskapir vilja vera við, at fregnartænastur hjá fyrrverandi forsetanum, Nicolás Maduro pína politiskar fangar. Bygningurin skal umbyggjast til ein ítrótta-, mentanar- og handilsmiðstøð.

Rodríguez, sum var varaforseti undir Maduro, hevur seinastu vikurnar verið virkandi forseti í Venesuela, eftir at Maduro og kona hansara vórðu tikin av amerikonskum herdeildum og flutt til USA 3. januar. Maduro er skuldsettur fyri m.a. smugling av rúsevnum, men hann noktar seg sekan.