Tey næstvaldu í trimum flokkum stilla ikki uppaftur

Fyrr í dag skrivaðu vit, at nógvar atkvøður ganga leysar. Hetta var í sambandi við verljarakanningina, sum Spyr.fo gjørdi fyri FM1 og Portalin hósdagin.

Sí eisini: Tjóðveldi tapir eftir samgonguslitið

Beint yvir 15 prosent siga seg ikki hava avgjørt enn, hvør flokkur skal hava sína atkvøðu. Men tað er eru eisini nógvar leysar atkvøður, í mun til valevni, sum ikki stilla upp aftur.

Í síðstu viku gjørdist greitt, at Magnus Rasmussen ikki stillar uppaftur. Hann var næstvaldur á sambandslistanum í 2022 við 712 atkvøðum.

Sí eisini: Nakað yvir 1.000 leysar sambandsatkvøður í Eysturoynni

Eftir løgmann hevur Ingilín Didriksen Strøm verið næstvald á javnaðarlistanum tvey tey seinastu valini. Hetta valskeiðið fór hon frá sum landsstýriskvinna, og tíðliga í kvøld kunngjørdi javnaðarkvinnan, at hon tekur ein steðg í politikki.

Næstvalda á Tjóðveldislistanum í 2022 gevst í politikki eftir 18 ár í Løgtinginum. Bjørt Samuelsen var bert tríggjar atkvøður aftanfyri Høgna Hoydal á seinasta løgtingsvali. Hon hevur verið løgtingsforkvinna hetta tingskeiðið - á heysti 2024 tapti Bjørt Samuelsen valið um formanssessin í flokkinum.

Tað eru atkvøðuslúkar, sum stóru flokkarnir skulu avloysa til valið 26. mars (Skíggjamynd: Kringvarpið)

Sí øll valúrslitini frá 2022 her

Av kvinnunum á tingi fingu Ingilín og Bjørt flest og næstflest atkvøður í 2022 - Ruth Vang, landsstýriskvinna er einasta kvinna við fleiri atkvøðum á seinasta vali (978).

Umframt tey næstvaldu, er greitt, at Kaj Leo Holm Johannesen ikki stillar upp aftur í mars. Hesum boðaði sambandsmaðurin frá fyrr í dag  - hetta eftir 25 ár í politikki.

Henrik Old hevur verið í politikki síðani í 1980'unum. Eftir øllum at døma gevst 78-ára gamli vágbingurin nú. Stórt ivamál er sum skilst um ein væl yngri javnaðarmann, Una Holm Johannesen.