Grækarismessuhald í Vági sunnudagin

Sunnudagin 15. mars klokkan 14.30 verður árliga Grækarismessuhaldið í Vági við Minnisvarðan, skrivar Vags kommuna.

Skótaliðið Royndin skipar fyri.

Í Vági hevur Grækarismessuhaldið í mong ár fevnt um røður, sang og felagssang, og í ár verður tað Miriam Jannit Norðberg, fødd og uppvaksin í Vági, sum heldur røðuna. Hon er leiðari á Ítróttarháskúlanum og eigur og rekur BRIM.

Kórið Ljómur luttekur eisini í hátíðarhaldinum og stuðlar undir felagssanginum. Aftaná verður boðið til drekkamunn í Miðlatúni, skrivar kommunan.