Elna Debess 50 ár í valstýrinum í Kollafirði

Fyrradagin var fólkatingsval, og tá var serligur hátíðardámur í valhølinum í Kollafirði.

Ein stór køka varð sett á borðið, nú Elna Debess hevur sitið í valstýrinum í Kollafirði í samfull 50 ár.

Jóan Petur Hentze, kommunustjóri, legði leiðina framvið og handaði Elnu blómutyssi vegna øll valstýrini í Tórshavnar kommunu, skrivar kommunan.

(Mynd: Tórshavnar kommuna)

Í dag er valhølið í Kollafirði í húsinum hjá skótaliðnum Túgvuni. Men so hevur ikki altíð verið.

Elna greiðir frá, at tá hon byrjaði, var valið í gamla skúla. Gjøgnum árini hevur valhølið verið ymsastaðni, millum annað í nýggja skúla og nú síðstu árini í skótahølinum.

Áðrenn Kollafjørður gjørdist partur av Tórshavnar kommunu, vóru tvey valstýri í Kollafirði – eitt fyri løgtings- og fólkatingsval og eitt fyri kommunuval. Nú er tað eitt valstýri fyri øll valini.