Alda Nielsdóttir
Ukrainski forsetin, Volodymyr Zelenskyj hevur bjóðað umboð úr USA til ukrainska høvuðsstaðin Kyiv at taka samráðingarnar um eina friðaravtalu uppaftur.
Innbjóðingin var givin á einum talgildum fundi í vikuni, sigur Zelenskyj sambært Ritzau. Hann leggur afturat, at hann hevur fingið "jalig signal" úr USA.
Amerikanarar hava áður roynt at mekla millum Ukraina og Russland fyri at fáa eina friðaravtalu í lag, men tað hevur higartil ikki eydnast.
Russland og Ukraina hava verið í kríggj síðan 24. februar 2022, og sambært ukrainska forsetanum er støðan hjá Ukraina á hermótinum betri, enn hon hevur verið seinastu tíggju mánaðirnar.
Fyrrapartin varð ukrainska høvuðsstaðarøkið rakt av einum umfatandi russiskum dronu- og rakettálopi. Í minsta lagi ein persónur lat lív.
Vinarliga broyt tínar kennifíla - og privatlívsstillingar fyri at síggja hetta innihald