Útlendingur verður mest sannlíkt sendur av landinum fyri at arbeiða ólógliga

Seinastu tíðina eru nakrir útlendingar, ið hava virkað sum ferðaleiðarar í Føroyum, skuldsettir fyri ólógligt arbeiði.

Nú er ein tikin fyri nakað líknandi - men fyri at vera arbeiðsgevari á ólógligan hátt.

Hetta er munandi meira álvarsamt enn at vera arbeiðstakari, greiðir løgreglan frá.

Vaktleiðarin á løgreglustøðini í Havn sigur í morgun, at persónurin varð tikin hósdagin og skuldsettur.

Hann fær stóra bót, og nú verður bíðað eftir boðum úr Danmark: Um viðkomandi skal útvísast ella ikki fyri ólógligt arbeiði.

Tað er mest sannlíkt, at útlendingurin verður sendur úr Føroyum og fær forboð fyri at arbeiða her.