Eisini fríkendur í Landsrættinum

Eystari Landsrættur hevur í dag viðgjørt málið um møguligt valsvik í Oyndarfirði, og landsrætturin hevur fyri løtu síðani staðfest dómin hjá Føroya rætti, visti útvarpið at siga á middegi.

Ein maður varð í februar fríkendur fyri valsvik í Oyndarfirði í sambandi við kommunuvalið í 2024, men ákæruvaldið valdi at kæra dómin. Landsrætturin metti tó ikki, at ákæruvaldið megnaði at lyfta próvbyrðuna.

Málið, sum er tað fyrsta um valsvik í Føroyum, snýr seg um ein atkvøðuseðil í Oyndarfirði, sum eftir fínteljing varð ógildaður, tí hann hevði tveir krossar. Hetta hevði við sær, at tað stóð á jøvnum millum tvey valevni, og varð tí avgjørt við lutakasti, hvør varð valdur í Runavíkar býráð.

Tá málið var fyri í Føroya rætti, kravdi ákæruvaldið fýra mánaða fongsul, meðan verjin kravdi frídøming ella treytaðan dóm.

Dagførd kl. 12.47