Burnham og Zelenskyj hittast í dag

Í dag skal ukrainski forsetin, Volodymyr Zelenskyj hitta nýggja bretska forsætisráðharran, Andy Burnham, og verður Zelenskyj sostatt fyrsti útlendski statsleiðarin, sum Burnham tekur ímóti.

Skrivstovan hjá Burnham, sum tók við sum forsætisráðharri fyri viku síðan, hevur boðað frá, at hann og Zelenskyj skulu vitja eina støð hjá bretska herflotanum og tosa við herfólk úr báðum londum í sambandi við venjing av ukrainskum herfólki.

Eisini skulu Zelenskyj og Burnham hitta umleið 200 ukrainsk herfólk og sjófólk, sum hava verið í Stórabretlandi seinastu tríggjar vikurnar og luttikið í trygdarvenjing á sjónum.

Skrivstovan hjá Burnham sigur, sambært Ritzau, at nýggi bretski forsætisráðharrin lovar at halda fram við "óslítandi sambandinum millum tær báðar tjóðirnar".

Sambært skrivstovuni hjá bretska forsætisráðharranum hava bretar stuðlað ukrainum við 25 milliardum pundum - 219 milliardir krónur - síðan Russland gjørdi innrás í Ukraina í februar 2022. Harav eru 16 milliardir pund - 140 milliardir krónur - farin beinleiðis til hernaðarstuðul.

Eftir vitjanina í Stórabretlandi skal ukrainski forsetin víðari til Washington D.C., har hann í morgin skal hitta amerikanska forsetan, Donald Trump.

Zelenskyj luttekur eftir ætlan eisini í jarðarferðini hjá amerikanska senatorinum, Lindsey Graham, sum andaðist fyrr í hesum mánaðinum.

Graham, sum var republikanari og stórur stuðul hjá bæði Trump og Ukraina, var júst komin heim úr Ukraina, tá hann andaðist.