Viðareiði er staðið har møguleikin er størstur

Alt bendir á, at ein skal leita sær norðureftir fyri at fáa ein møguleika at uppliva partvísu sólarmyrkingina, sum byrjar beint áðrenn klokkan 18 í dag.

Veðurstovan skrivar, at manningin har er farin til Viðareiðis fyri at uppliva sólarmyrkingina saman – har eru sannlíkindini størri enn aðrastaðni í Føroyum, skrivar Hanus Kjølbro á heimasíðuni hjá Veðurstovuni.

Ætlanin var at fara niðan á Háls oman fyri Klaksvík, tí har er einki fjall fyri. Men har er svart í mjørka, so svart, at tað sæst illa bara at koyra við bili niðan.

Tí fara vit heldur til Viðareiðis at hyggja, skrivar Hanus Kjølbro. Men hann leggur afturat:

- Einki er vist her í verð, serliga tá ið tað hevur við veðrið at gera. Skýloftið kann broytast báðar vegir, men sannlíkindi er ið hvussu so er betri, at okkurt sæst á Viðareiði heldur enn í Klaksvík.

- Vit standa heimi á Bakka – t.e. nær við kirkjuna – eitt sindur áðrenn klokkan 18. Havi keypt nakrar brillur, sum tit kunnu læna. Eisini nakrar kannur við kaffi og okkurt søtt.