Russiskur krígsandstøðingur dømdur til 11 ár í arbeiðslegu

Ein framstandandi limur í liberala russiska Jabloko flokkinum var í dag dømdur í arbeiðslegu í 11 ár og ein mánaða, skrivar Reuters tíðindastovan.

Talan er um politikaran Lev Sjlosberg, ið varð dømdur fyri at hava fordømt krígnum í Ukraina, sum hann undir rættarviðgerðini kallaði fyri eina vanlukku.

Sjlosberg, ið er næstformaður í Jabloko, var ákærdur fyri at hava funnist at vápnaðu styrkjunum. Sambært ákæruni hevði hann spjatt skeivar upplýsingar um herdeildirnar.

Sjlosberg í samrøðu við konuna Zhanna á rættarfundinum í dag, tá dómurin var sagdur (Mynd: Dmitry Vasilyev/Reuters/Ritzau Scanpix)

Í endarøðu síni fyri rættinum fríggjadagin segði politikarin, at hann var offur fyri einum politiskum rættarmáli. Eisini endurtók hann áheitanir um at fáa vápnahvíld í lag í Ukraina.

- Fólk í túsundatali eru deyð í ótíð. Fyrr ella seinni fáa vit tað sannað talið av deyðum at vita – við nøvnum – og tjóðin fer at skakast orsaka av hesum listanum av pínslaváttum, segði Sjlosberg í røðuni, sambært russiska miðlinum Mediazona.

Mediazona og russiska BBC hava skrásett nøvnini á minst 239.354 deyðum herfólkum. Tølini eru funnin í almennum skjølum. Miðlarnir skriva tó, at veruliga talið av deyðum er hægri.

Hvørki Russland ella Ukraina kunngera almenn tøl av deyðum í krígnum, skrivar Ritzau.

Tað er bert ein vika síðan, at hægstirættur í Russlandi sýtti Jabloko fyri at stilla upp til russiska tjóðartingsvalið í september.

Jabloko er einasti av russisku flokkunum, sum eru ímóti russiska krígnum í Ukraina.

Tað var tjóðskaparflokkurin Rodina, sum fór til rættin fyri at útihýsa Jabloko frá tjóðartingsvalinum.

Rodina flokkurin segði eittnú, at Jabloko hevur tikið móti stuðuli til valstríðið úr vestanlondunum, skrivar Ritzau.