Hevði hassj í viðførinum

Tollararnir á Vága floghavn steðgaðu í gjár einum manni, sum hevði rúsevni í viðførinum.

Talan var um ein dana, sum var komin við flogfari úr Danmark, sum hevði 3-400 gram av hassji í viðførinum.

Tá talan er um so stóra nøgd, verður mett, at hassjið var ætlað til víðari sølu, sigur vaktleiðarin á løgreglustøðini í Havn.

Maðurin varð handtikin, skuldsettur og leyslatin aftur. Hann kann vænta sær eina bót og ein treytaðan dóm.