Nærum 30.600 starvsfólk í september

508 fólk løgdust afturat starvsfólkaskaranum í september, sum er ein vøkstur á 1,7 prosent í mun til september í fjør.

Sambært Hagstovuni vóru 30.576 starvsfólk í Føroyum í september.

Talan var um 15.600 menn og slakar 15.000 kvinnur.

Fyri menn er vøksturin 1,8 prosent, og fyri kvinnur vøksturin 1,6 prosent samanborið við sama mánað árið fyri.

Meira enn helvtin - 57 prosent - av starvfólkunum arbeiða hjá arbeiðsgevarum undir privatum ræði og restin - 43 prosent - arbeiða hjá arbeiðsgevarum undir almennum ræði.

Tá hugt verður at ymisku vinnugreinunum sæst, at størsti vøksturin var í flutnings- og goymsluvinnuni og innan gisting og matstovuvinnu. Har løgdust afturat ávíkavist 118 og 114 starvsfólk í mun til í fjør, skrivar Hagstovan.