Ragnhild fekk Kongens Fortjenstmedalje

Fríggjadagin 23. oktober var hátíðarhald á Rannsóknarstovuni í sambandi við, at Ragnhild Skarðhamar hevur havt 40 ára starvsdag á Landssjúkrahúsinum og samstundis fekk handað Kongens Fortjenstmedalje.

Per Busk, stjóri á Landssjúkrahúsinum, Ann Østerø, depilsleiðari á Diagnostiska depli, og Joan Petersen, leiðari á Blóðbankanum hildu røðu, har tey millum annað løgdu dent á stóra fakliga kunnleikan, trúskapin og týdningin, Ragnhild hevur havt fyri Rannsóknarstovuna gjøgnum sítt langa arbeiðslív, skrivar Landssjúkrahúsið.

– Ragnhild byrjaði á Rannsóknarstovuni í 1985 og hevur í fýra áratíggju verið ein virðismikil partur av arbeiðsplássinum. Kongens Fortjenstmedalje verður latin fyri langa og trúgva tænastu og er ein sjáldsom og virðilig viðurkenning av hennara arbeiði.