Innanlands

Norðoya Sparikassi 9,5 milliónir í avlopi í 2019

Eginognin rentaði við 3,9 prosentum við árslok. Rokniskapurin varð góðkendur av nenvdini 16. mars, og samanumtikið er nøgdemi viðvíkjandi gongdini

2020-03-26 18:17 Author image
Tíðindaskriv
placeholder

Úrslitið áðrenn skatt í 2019 var eitt avlop á 9,5 mió. kr. Eginognin rentaði við 3,9 % og solvensurin var 21,7% við árslok 2019.

Vøksturin í útlánum var 3,2 % ella 60 mió. kr. Útlánini øktust úr 1.886 til 1.947 mió. kr.

Vøksturin í innlánum var 4,4 % ella 100 mió. kr. – úr 2.302 mió. kr. upp í 2.403 mió. kr. Innlánsavlopið var 456 mió. kr. við ársenda 2019.

Áhugin fyri at seta pening í ábyrgdarfæ er framvegis stórur og líkt er til, at ábyrgdarar hava álit á sparikassanum og eru væl nøgdir við rentuna, sum í løtuni er 4%. Samlaða ábyrgdarfæið var 25,2 mió. kr. við árslok 2019 í mun til 20,8 mió. kr. við ársbyrjan. Hetta er ein øking á 4,4 mió. kr. ella 21,3%.

Gjaldføri og solvensur Gjaldførið er gott. Við ársenda 2019 var yvirdekningurin í mun til lógarkravda gjaldførið 174%.

Eisini solvensurin er góður. Við ársenda 2019 var solvensurin 21,7% sammett við 20,5% árið fyri.

Rokniskapurin varð góðkendur av nenvdini 16. mars. Samanumtikið er sparikassin væl nøgdur við gongdina í 2019.

Norðoya Sparikassi 100 ár
Árið 2019 var eitt merkisár, tí 24. septembur 2019 vóru 100 ár liðin, síðani Norðoya Sparikassi varð stovnaður, og hetta ynskti sparikassin at hátíðarhalda gjøgnum alt árið.

Á hvørjum ári er ein røð av mentanarligum og ítróttarligum tiltøkum, sum sparikassin stuðlar og í 2019 hevur sparikassin verið serliga sjónligur í sambandi við hesi tiltøk og dagar.

100-ára hátíðarhaldið endaði leygardagin 28. septembur 2019 við stórum tiltaki fyri ábyrgdarum, viðskiftafólki og almenninginum – bæði børn og vaksin – í ítróttarhøllunum í Klaksvík. Umframt mat og undirhald var framløga av 100-ára minnisriti.

Sparikassin er væl nøgdur við 100-ára hátíðarhaldið og góðu undirtøkuna í hesum.

Orsakað av koronasmittuni er umboðsráðsfundurin fyribils útsettur - meira verður at frætta seinni.

Ársfrásøgnin fyri 2019 verður tøk á heimasíðu sparikassans eftir umboðsráðsfundin.

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder