Fleiri enn hundrað kanningar um dagin hesa vikuna

Eingin nýggjur smittutilburður er staðfestur í Føroyum við korona. Tað vísa nýggjastu tølini hjá Heilsumálaráðnum.

Hetta hóast nógvar kanningar verða gjørdar. Teir fýra dagarnar kanningar eru gjørdar í hesari vikuni hevur talið ligið yvir hundrað. Týsdagin vóru 180 kanningar gjørdar, mikudagin 146, hósdagin 131 kanningar og í gjár vóru 123 kanningar gjørdar.

Hyggja vit eftir talinum av kanningunum, hevur hendan vikan ligið nakað hægri enn seinastu vikurnar, og samlaða talið av kanningum er nú eisini komið upp á 10.257.

187 fólk hava fingið staðfest korona í Føroyum, og øll eru blivin frísk aftur. Ikki síðani 22. apríl er nakar nýggjur tilburður staðfestur.