Mentan

Nýggj útgáva hjá Taylor Swift sett met í USA

Eftir einari viku eru 615.000 eintøk av útgávuni "Folklore" seld í USA, og um allan heimin eru fleiri enn tvær mió. eintøk seld

Taylor Swift (Savnsmynd)

Taylor Swift (Savnsmynd)

2020-08-03 10:42 Author image
Alda Nielsdóttir
placeholder

24. juli gav heimskenda amerikanska poppsangkvinnan, Talyor Swift út nýggju fløguna "Folklore", og eftir eina viku er hon vorðin best seljandi útgávan, sum er komin út í USA í ár.

Sambært Ritzau er útgávan higartil seld í 615.000 talgildum ella fysiskum eintøkum. Sostatt yvirhálar útgávan hjá Taylor Swift "Map of the Soul" hjá K-poppbólkinum BTS, sum er seld í 574.000 eintøkum í USA, síðan hon varð givin út í februar.

Sambært plátufelagnum hjá Taylor Swift, Republic Records, eru fleiri enn tvær mió. eintøk av  "Folklore" seld um allan heimin. Sostatt hevur sangkvinnan tryggjað sær eitt fyrsta pláss á amerikanska hitlistanum Billboard 200.

Hetta er sjeyndu ferð, at tann nú 30 ára gamla Taylor Swift hevur eina útgávu sum nummar eitt á Billboard 200. Tær einastu kvinnurnar, sum hava havt fleiri útgávur á fyrstaplássinum eru Barbra Streisand og Madonna, sum hava ligið ovast á hitlistanum ávikavíst 11 og níggju ferðir.

Tað er bretski bólkurin, The Beatles, sum hevur ligið oftast á fyrsta plássinum – 19 ferðir.

"Folklore" er áttanda studioútgávan hjá Taylor Swift. Hon varð tikin upp í loyndum, meðan sangkvinnan var í sóttarhaldi undir koronafarsóttini.

Í fyrstu vikuni varð útgávan longu stroymd fleiri enn 289,9 mió. ferðir.

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder