Nicola Sturgeon fer frá

Hon hevur verið fyrstiráðharri í Skotlandi síðani 2014, og so leingi hevur eingin verið í sessinum. Nú 52-ára gamla Nicola Sturgeon verður í sessinum sum fyrstiráðharri Skotlands eina tíð afturat - tó bert til  ein avloysari er funnin.

- Tað er tann rætta avgerðin fyri meg og mín flokk. Eg havi hugsa um tað leingi og spurt meg sjálvan: Er tað tað rætta fyri meg at halda fram? Og meira týdningarmikið: Er tað tað rætta fyri land mítt. Svarið er nei

Nicola Sturgeon tók við sum forkvinna í SNP - skotska tjóðskaparflokkinum - og sum fyrstiráðharri í november 2014, eftir at tað gjørdist talan um eitt tepurt nei á fólkaatkvøðuni um loysing frá Stórabretlandi.

Sturgeon hevur framahaldandi arbeitt fyri loysing - tó hava atfinningar verið um, at hon ikki hevur verið nóg ágangangandi hesum viðvíkjandi. Hon ætlaði at fáa eina nýggja fólkaatkvøðu ásetta til oktober 2023, men stjórnin í London forðaði fyri hesum. Á tíðindafundinum lýsti hon koronutíðina, sum eina av tí harðastu á hennara politisku lívsleið.

Les eisini: Nicola Sturgeon ætlar at skipa fyri nýggjari fólkaatkvøðu

Nicola Sturgeon gevst sum bæði fyrstiráðharri í Skotlandi og sum forkvinna í SNP. Hon hevur verið limir í skotska lóggávutinginum (parlamentinum) síðani 1999 og skotsku stjórnini síðani 2007, har hon hevur staðið á odda fyri ymiskum embætum.