2,3 milliardir í lønum í 3. ársfjórðingi – vøksturin í lønunum avtakandi

Tølini hjá Hagstovu Føroya fyri lønarútgjaldingar í 3. ársfjórðingi vísa, at vøksturin ikki hevur verið eins stórur sum áður, at kvinnurnar síggja ein vøkstur í lønarútgjaldingum, og at lønarútgjaldingarnar í eitt nú fiskivinnuni eru minkandi.

Í 3. ársfjórðingi vóru 2.290 milliónir útgoldnar í løn. Trendurin vísir, at seinasta árið hevur vøksturin í lønunum ikki verið eins stórur, sum áður.

Seinasta árið er stígur komin í lønargjaldingarnar hjá monnum og lønirnar standa í stað, meðan hjá kvinnum sæst ein javnur vøkstur.

Myndin niðanfyri vísir, at tað er í høvuðsvinnugreinabólkunum fiskivinna og øðrum ráevnisvinnum, at lønirnar eru minkandi, meðan í hinum vinnugreinabólkunum sæst ein lutfalsliga javnur vøkstur.

Sum sæst á myndini niðanfyri eru lønarútgjaldingarnar minkandi í Streymoy, Eysturoy og Norðoyggjum.