Hagstovan: Fiskavøruútflutningurin minkaður eina knappa milliard krónur

Í tíðarskeiðnum oktober 2023 til september 2024 varð útflutt fyri 11,9 milliardir krónur, sum er 1,1 milliard minni enn undanfarnu 12 mánaðirnar.

Fiskavøruútflutningurin í hesum tíðarskeiðnum var 11,2 milliardir, sum er ein minking á 989,4 milliónir, ella góð átta prosent, skrivar Hagstovan.

Útflutningurin av laksi, toski og fóðuri gongur fram, meðan útflutningurin av øðrum fiskasløgum gongur aftur.

Útflutningurin av laksi er vaksin 552,7 milliónir krónur. Virðið er vaksið góð 10 prosent, og nøgdin er vaksin 17,5 prosent.

Útflutningurin av toski er vaksin 101,1 millión krónur, og virðið er vaksið 11 prosent. Nøgdin er vaksin 12,6 prosent.