Fleiri landingar í Fuglafirði

Fleiri uppsjóvarskip eru komin inn at landa til bæði Pelagos og Havsbrún í Fuglafirði.

Grønlendska uppsjóvarskipið Tasiilaq hevur landað umleið 600 tons av sild til Pelagos, sum skipið hevur fiskað norðanfyri í altjóða sjógvi.

Umframt Tasiilaq so er Arctic Voyager eisini komin inn við sild, sum verður landað til  Pelagos.

Arctic Voyager hevur 800 tons av sild, sum skipið hevur fiskað í altjóða sjógvi norðanfyri Føroyar.

Hjá Havsbrún liggur ikki stilt hóast flestu skipini eru á sildaveiðu.

Norðingur er komin inn við 1.900 tonsum av svartkjafti, sum er fiskaður í føroyskum sjógvi. Norðingur byrjaði at landa til Havsbrún í morgun.

Hjá Havsbrún verður svartkjafturin framleiddur til mjøl og lýsi, og síðani til fóður.