Trý skip farin á svartkjaftaveiðu við Írland

Talan er um uppsjóvarskipini Christian í Grótinum, Finn Fríða og Gøtunes.

Chriistian í Grótinum var fyrsta skipið, sum loysti og setti kós móti svartkjaftafeltinum.

Christian í Grótinum hevur júst landað umleið 2.700 tons av svartkjafti til Havsbrún, og fór beint aftur til fiskiskap.

Síðani loysti Finnur Fríði, sum hevur ligið á Runavík seinastu dagarnar, og gjørt ymsar tillagingar umborð í sambandi við svartkjaftafiskiskapin.

Gøtunes hevur júst landað 1.300 tons av svartkjafti til Varðan Pelagic á Tvøroyri, og setti síðani kós móti svartkjaftafeltinum við Írland eins og hini bæði.

Hóast trý skip eru farin á svartkjaftaveiðu við Írland, so eru nøkur til fiskiskap undir Føroyum.

Fagraberg, Borgarin, Hoyvík, Ran og Norðingur eru øll til fiskiskap eystan fyri Føroyar í løtuni.

Nýggjasta skipið í føroyska flotanum er Høgaberg, sum framvegis liggur á Fuglafirði, har tað hevur ligið síðani tað kom til Føroya fyri fyrstu ferð síðsta fríggjadag, men sum skilst, so verður kósin sett móti Írlandi fyrsta dagin, har skipið skal fiska svartkjaft.