Kappingareftirlitið fingið fráboðan um søluna av Biritu við kvotum

Uppsjóvarskipið Birita skal seljast við kvotum, og tað er ein støða sum Kappingareftirlitið nú skal góðkenna. 

Kappingareftirlitið hevur móttikið fráboðan um, at P/f Jókin og P/f Vestmanna Fiskavirki í felag hava gjørt avtalu við Sp/f Gráastein um keyp av uppisjóvarskipinum "Birita" við tilhoyrandi veiðiloyvi og øllum fiskirættindum.

Eftir ætlan verða fiskirættindini býtt millum keypararnar, P/f Jókin og P/f Vestmanna Fiskavirki, og gagnnýtt av teimum skipum, sum keypararnir frammanundan eiga.

Talan er um eina yvirtøku sambært § 13, stk. 1, nr. 2 í kappingarlógini, og tá umsetningurin hjá pørtunum er omanfyri mørkini í § 14, stk. 1, nr. 1, er talan um eina yvirtøku, sum kemur undir fráboðanarskylduna í § 16, stk. 1. 

Tað var tann 15. oktober at Fiskimannafelagið skrivaði á heimasíðu síni at P/f Jókin og P/f Vestmanna Fiskavirki ætlaðu at keypa Biritu við kvotum, og at keyppsprísurin liggur um 250-300 milliónur krónur.

Birita kom í føroyska flotan í 2021, og talan var um kvotur til ítøkuligt skipakeyp, sum er grundarlagið hjá felagnum, sum felagið fekk tillutað frá landinum.