Innanlands

Nýtt orkufelag við ætlanum um oljugoymslu á Hulki

Krafta og Sjóvar kommuna til reiðar at skriva undir avtalu – bíðað verður eftir neyðugu loyvunum til ætlanina

Havnin á Hulki. Her ætlar Krafta at byggja sínar oljugoymslur (Mynd: Google)

Havnin á Hulki. Her ætlar Krafta at byggja sínar oljugoymslur (Mynd: Google)

2023-11-27 15:36 Author image
Ingi Samuelsen

Oljufelagið Krafta og Sjóvar kommuna ætla at gera avtalu um eitt økið á Hulki, har Krafta fer undir at byggja eina oljugoymslu. Avtalan er treytað av, at neyðug loyvi fáast til verkætlanina.

Oljugoymslan á Hulki verður 5.000 fermetrar til støddar, við tveimum tangum á 2.500 rúmmetrar.

Oljugoymslan verður eitt gott ískoyti til verandi oljukapasitetin í Føroyum, og harvið eisini eitt gott ískoyti til trygdartilbúgvingina, havandi í huga ótryggu støðuna í heiminum. Gongur eftir ætlan er oljugoymslan klár at taka í nýtslu um ársskiftið 2024-25.

[object Object]
Rói Kalsø, stjóri í Krafta

- Vit meta, at staðsetingin á Hulki er tann besta fyri virksemið hjá Krafta. Hulkur er ein av góðu náttúruhavnum í Føroyum. Staðsetingin er eisini avgerandi fyri virksemið hjá Krafta, sum leggur seg eftir at veita olju til skip. Tí eru vit sera fegin fyri avtaluna við Sjóvar kommunu, sigur Rói Kalsø, stjóri í Krafta í tíðindaskrivi.

- Í Sjóvar kommunu fegnast vit um at fáa virksemi á Hulki, sum vendir sær til sjóvinnuna. Verkætlanin hjá Krafta hóskar seg væl til ætlanirnar hjá Sjóvar kommunu um at fáa meira virksemi á Hulki, har kommunan hevur gjørt íløgur í at betra um karmarnar fyri vinnuligt virksemi, sigur Artur Johansen, borgarstjóri.

Oljugoymslan verður bygd eftir nútímans ásetingum og við nýggjastu trygdartøkni, til tess at fyribyrgja dálking ella møgulig óhapp. Krafta er farið undir at fáa neyðug loyvi, so at farast kann undir at byggja oljugoymsluna.

Krafta hevur síðani fyrst í juli í ár handla olju til skip, og hevur Krafta merkt ein sera jaligan hugburð frá sjóvinnuni og almenninginum sum heild.

- Við egnari oljugoymslu, kemur verulig kapping á oljumarknaðin í Føroyum, sigur Rói Kalsø. 

Les eisini: Nýggja oljufelagið eitur Krafta

Vinarliga broyt tínar kennifíla - og privatlívsstillingar fyri at síggja hetta innihald